Ban dauki “selfie” da gawar mahaifina ba -Hafsat Idris

Fitacciyar jarumar fina-finan Hausar nan Hafsat Idris wadda akafi sani da Barauniya ta musanta rade-radin da ake ta yadawa a kafafan sada zumunta na cewa ta dauki hoton dauki da kanka wato “selfie” da gawar mahaifinta.

A safiyar yau ne dai aka tashi da labarin mutuwar mahaifin jarumar kamar yadda ta wallafa a shafinta na Instagram hade da wani hoto tare da mahaifin nata a lokacin da yake fama da rashin lafiya.

Sai dai wasu al’umma sunyi mata mummunar fahimta inda suka rika cewa jarumar ta dauki hoton ne bayan da mahaifin nata ya rasu.

Sai dai a yammacin yau jaruma Hafsat Idris ta musanta zargin inda ta sake wallafawa a shafinta cewa “nayi posting hoto tare da mahafina wasu na cewa wai nayi hoto da gawa, ya za’ayi hoto da gawa? Banyi hoto da gawa ba. Wannan hoton tun da rayuwarshi muka dauka.
Allah ya mishi rahma ameen”.

Wannan dai ya kawo karshen cecekucen da akeyi kan wannan batu.

Allah ya kyauta, ya kuma jikan musulmi baki daya.