Abin da ya sanya muka hana jirage shawagi a Zamfara – Buhari

Fadar shugaban kasa ta ce akwai kwararan hujjoji da ke nuna cewa akwai jiragen sama da suke jefa makamai ga ‘yan bindiga a jihar Zamfara.

Babban mataimaki na musamman ga shugaban kasa kan harkokin yada labarai Malam Garba Shehu ne ya bayyana haka yayin zantawa da jaridar Daily Trust.

‘‘Babu yadda za ayi gwamnati ta zura ido tana gani batagari suna amfani da jirage wajen tada tarzoma a kasar nan, wannan dalili ya sa gwamnati ta haramtawa jirage shawagi a sararin samaniyar jihar Zamfara’’ a cewar Malam Garba Shehu.

‘‘Mun samu labarai daga kafa mai karfi da ke cewa ana bani gishiri in baka manda tsakanin ‘yan bindiga da masu safarar makamai’’

‘‘Su bada makamai su kuma ‘yan bindiga su basu gwala-gwalai, inda masu safarar makaman ke jefawa ‘yan bindigar makamai ta sama’’ inji babban mataimaki na musamman ga shugaban kasar.

Idan za a iya tunawa a jiya ne gwamnatin tarayya ta sanar da haramtawa jiargen sama shawagi a sararin samaniyar jihar Zamfara da kuma hana masu hakar ma’adinai gudanar da aiki a jihar.

Mun hana jirage shawagi a sararin samaniyar jihar Zamfara ne saboda muna zargin jiragen suna jefawa ‘yan bindiga makamai inji Buhari.