ACF ta bukaci Gwamnati ta mayar da hankali kan matsalar tsaro

Ƙungiyar tuntuba ta Arewa, ACF, ta buƙaci gwamnatin tarayya ta daina fifita kan zaɓen shekarar 2027, tare da fifita magance matsalar rashin tsaro da ke ƙara ta’azzara a ƙasar.

A cikin wata sanarwa da sakataren yaɗa labaranta na ƙasa, Farfesa T. A. Muhammad-Baba, ya fitar, ƙungiyar ta ce hare-hare, kashe-kashe, sace mutane da lalata dukiyoyi da ƙungiyoyin masu ɗauke da makamai ke yi na barazana ga wanzuwar kasar nan. Ta zargi masu riƙe da mukaman siyasa da fifita harkokin zaɓe a kan tsaro da jin daɗin al’umma.

Kungiyar ta nuna damuwa kan ci gaba da garkuwa da mutane, tana mai cewa har yanzu ‘yan ta’adda na riƙe da yara da dama a jihohin Borno da Kwara da wasu sassan ƙasar, yayin da wasu waɗan da aka sace ke cikin mawuyacin hali.

ACF ta kuma ce an samu hare-hare daban-daban guda biyar a jihar Zamfara a rana guda, waɗanda suka yi sanadin mutuwa da sace mutane da kuma wawushe dukiyoyi. Ta ƙara da cewa ana ci gaba da samun kashe-kashe da hare-hare a jihohin Filato da Taraba, da kuma Benue da Neja da Katsina da Kogi.