Aisha Buhari Cup: Super Falcons za ta kara da Morocco a wasan farko

Mai masaukin baki Najeriya za ta fafata da Morocco a gasar cin kofin Aisha Buhari da za a fara ranar 13 ga watan Satumba mai kamawa.

Za dai a gudanar da gasar ne a filin wasa na Mobolaji Johnson a jihar Legas.

Kasashen Najeriya da Morocco da kuma Mali sun kasance a rukunin A, yayin da Cameroon da Ghana da kuma Afirka ta kudu suka kasance a rukunin B.

Daraktar shirya gasar, Aisha Falode ta ce kasashen dake a rukunin A za su fafata a filin wasa na Mobolaji Johnson, inda kuma wadanda ke a rukunin B za su yi nasu a Soccer Temple duk a jihar ta Lagos.