Allah ya yi wa ɗan majalisar dokokin Kano na Ɓagwai/Shanono

Allah ya yi wa ɗan majalisar dokokin jihar Kano mai wakiltar ƙananan hukumomin Ɓagwai da Shanono rasuwa.

Da safiyar yau Lahadi ne aka gudanar da jana’izar ɗan majalisar Alhaji Halilu Ibrahim Kundila, wanda Allah ya yi masa rasuwa a daren jiya Asabar.

An dai yi jana’izar marigayin ne a garinsu na Kundila da ke karamar hukumar Shanono.

Marigayi Alhaji Halilu Ibrahim Kundila, wanda aka zabe shi a matsayin dan majalisar jiha a jam’iyyar APC a zaben da ya gabata na bara, ya rasu ya na da shekaru 59 a duniya, kuma ya bar mata 4 da ‘ya’ya 17.

Kafin rasuwarsa, ɗan majalisar shi ne shugaban kwamitin karɓar ƙorafi na majalisar dokokin jihar Kano.