An ci gaba da tsare mu bayan Buhari ya yi mana afuwa – Sojoji

Sojojin nan sittin da shida wadanda wata kotun soji ta kamasu da laifi a kwanakin baya kafin daga bisani shugaba Buhari ya yi musu afuwa, sun shigar da kara gaban babbar kotun tarayya da ke Lagos, suna kalubalantar ci gaba da tsaresu a gidan gyaran hali.

Sojojin sun kuma bukaci kotun ta tursasa ministan cikin gida Rauf Aregbesola da shugaban hukumar kula da gyaran hali ta kasa, Ja’afaru Ahmed da su biya su diyyar naira biliyan daya da miliyan dari uku da ashirin sakamakon danne musu ‘yancinsu na walwala.

Lauyan sojojin Funmi Falana SAN, ta ce ci gaba da tsare wadanda ta ke karewar a gidan gyaran halin duk da cewa shugaba Buhari yayi musu afuwa tun a ranar tara ga watan Afrilun bana, ya sabawa kundin tsarin mulkin kasar nan.

Saboda haka ta bukaci kotun da ta tursasa wadanda suke da hannu wajen ci gaba da tsaresu a gidan gyaran halin da su biya su diyya.