Mun kama masu bayar da bayanan sirri ga ‘yan ta’adda – SOJOJI

Rundunar sojin kasar nan ta Operation Sahel Sanity sun yi nasarar cafke wadanda ake zargin suna kaiwa yan bindiga bayanan sirri tare da taimaka musu wajen siyo abinci su 22 a jihohin Katsina da Zamfara.

Daraktan yada labarai na rundunar sojin Benard Onyeuko ne ya bayyana hakan ta cikin wata sanarwa da ya fitar.

Onyeuko ya ce, a yayin sumamen da rundunar ta kai maboyar ‘yan tada kayar bayan, tayi nasarar ceto makiyaya 40 da ‘yan tada kayar baya suka yi garkuwa da su tare da lalata maboyar ta su.

Sanarwar ta kara da cewa an yi nasarar kama mutanen ne a jihohi biyu na kasar nan, tun daga ranar biyar ga watan Agusta zuwa sha daya ga watan.

Kazalika rundunar ta ceto wata mata da ake kyautata zaton tana da aure wadda kuma take kai bayanan sirri ga yan tada kayar baya a jihar Katsina tare da siyar musu da dabbobin da suka sace a kasuwa don siyo musu kayan bukata.

Ta cikin sanarwar dai, Onyeuko ya kara da cewa, rundunar ta samu nasarar kashe daya daga cikin yan ta’addar, yayin da wasu da dama suka tsere wanda hakan ya bada nasarar kwashe makaman da suke amfani da su, da suka hadar da bindigogi.