An nada Sarkin Dutse Alh. Nuhu Muhammad Sanusi a matsayin uban jami’ar jihar Sokoto

Gwamnan Jihar Sokoto Aminu Waziri Tambuwal ya nada Sarkin Dutse Alhaji Nuhu Muhammad Sanusi a matsayin uban jami’ar Jihar Sokoto.

An yi nadin ne a jiya asabar 13 ga watan Maris lokacin bikin yaye daliban jami’ar, inda kuma aka sanyawa ginin majalisar dattijan jami’ar sunan marigayi Alhaji Umaru Ali Shinkafi, sai kuma dakin karatun jami’ar da aka sanyawa sunan marigayi Inuwa Abdulkadir.

Gwamna Aminu Waziri Tambuwal ya ce ilimi shi ne jigon ci gaban ko wace al’umma, a don haka gwamnatinsa ta mayar da hankali wajen sanya kashi 26 na kasafin kudin ko wace shekarar.

Ya kara da cewa ko a shekarar 2016 sai da ya ware kashi 29 cikin dari a matsayin kasafin kudin ma’aikatar ilimin, wanda ma ya zarta yadda hukumar raya ilimi, kimiyya da al’adu ta majalisar dinkin duniya UNESCO ta tsara.