An sanya ranar zaben shugabanni da Kansiloli a Katsina

Hukumar zabe a jihar Katsina ta sanya ranar 25 ga watan Fabrairun da muke ciki a matsayin ranar da za a gudanar da zaben shugabanni da kansiloli a kananan hukumomin jihar.

Shugaban hukumar Alhaji Lawal Alhassan ne ya bayyaa hakan a ranar Laraba, lokacin da yake yiwa masu ruwa da tsaki jawabi kan shirin zaben.

Ya ce, an sanar da ranar zaben ne kamar yadda sashi na 197 na kundin tsarin mulkin kasa na 1999 ya bada dama.

Alhaji Lawal Alhassan ya kuma ce, duk dan takarar da yake sha’awar tsayawa a kowacce jam’iyya yana da damar yin hakan a zaben da ke tafe na shugabanni da kansiloli.

Ya kuma jaddada cewa, kowacce jam’iyya za a baiwa shugabanninta ka’idojin da aka tsara don yin biyayya.