Athletico Madrid da Manchester United sun tashi wasa 1-1

Kungiyar kwallon kafa ta Athletico Madrid daga kasar Spain da Manchester United sun tashi wasa 1-1 a gasar cin kofin zakarun turai Champions League

Gumurzu tsakanin kungiyoyi biyun ya gudana a ranar Laraba 23 ga Fabrairu a filin Wanda Metropolitano da ke kasar Spain.

A minti na 6 da fara wasan matashin dan wasan kasar Portugal Jao Felix ya zura kwallon farko.

Sai dai a minti na 79 bayan dawowa zagaye na biyu dan wasa A. Elanga ya warware kwallon da aka zura musu a raga.

Wannan dai wasa zagaye na farko ne na kungiyoyi 16 a gasar, inda a ranar 15 ga Maris Manchester United zata karbi bakuncin Athletici Madrid domin sanin kungiyar da zata kai wasan kusa da na kusa da karshe a gasar.

A daya wasan da ya gudana a ranar Larabar Benfica daga kasar Portugal da Ajax daga Holland sun tashi wasa 2-2.