Azal: Mutane 6 sun rasa ran su a hatsarin mota – FRSC

Hukumar kiyaye abkuwar haddura ta kasa reshen jihar Bauchi ta ce mutane shida sun rasa rayukansu yayin da 54 suka samu raunuka a wani hatsarin mota da ya rutsa da su a jihar.

Kwamandan hukumar Yusuf Abdullahi ne ya tabbatar da hakan yayin da yake zantawa da manema labarai.

A cewar sa hatsarin ya rutsa da ’yan kasuwar da ke tafiya daga garin Darazo a karamar Hukumar Darazo da ke Jihar Bauchi zuwa Kasuwar Dakuku ta jihar Gombe.

Yusuf Abdullahi ya ce, a binciken su sun gano yadda motar mai dauke da fasinjoji 72 ke yin gudun wuce sa’a wanda hakan ne ya haddasa hatsarin, wanda kuma tuni an aike da wadanda suka jikkata zuwa asibiti don karbar kulawa.