Hatsarin mota ya yi sanadiyar mutuwar mutane 3

Hukumar dakile da abkuwar hadurra ta kasa (FRSC) shiyyar jihar Bauchi, ta tabbatar da mutuwar mutane uku sakamakon fadawa da motar da suke tafiya a ciki ta yi, a cikin wani kogi da ke jihar Bauchi.

A cewar hukumar ta FRSC, mutanen uku sun yi hatsarin ne a ranar goma sha biyu ga wannan wata da muke ciki na Maris amma ba a kai ga gano su ba, sai bayan kwanaki uku.

Hatsarin dai ya abku ne a garin Tasham Turmi da ke da nisan kilomita uku akan hanyar Bara zuwa Gombe a yankin karamar hukumar Alkaleri.

Kwamandan hukumar dakile abkuwar hadurra ta kasar a jihar Bauchi Yusuf Abdullahi shi ya bayyana hakan ga manema labarai a Bauchi.

A cewar hukumar, duk mutane ukun da ke cikin motar wadanda maza ne sun rasa rayukansu.