Ba zan taɓa yarda a halatta amfani da Wiwi a Kano ba – Ganduje

Gwamna Dr. Abdullahi Umar Ganduje ya ce, Kano ba zata goyi bayan halasta amfani da tabar wiwi ba.

Gwamnan ya bayyana hakan ne, yayin da ya karɓi baƙuncin shugaban hukumar NDLEA na ƙasa Janar Buba Marwa Mairitaya.

A jawabinsa, Gwamna Ganduje ya nanata cewa jihar Kano ba zata amince da kiraye-kirayen da wasu ɓangarorin ƙasar nan ke yi ba, na neman a halasta ta’ammali da Wiwi.

Ya ce, al’ummar Kano ba su da wata buƙata game da hakan, don haka kada ma a soma tunkararsa da wannan batun.