Babu sha’irin da zai yi wakokin yabo a Kano sai yana da ID Card – Afakallah

Hukumar tace fina-finai dab’i ta Jihar Kano ta kaddamar da shirin bayar da katin shaida wato ID Card ga masu waken yabo wato sha’irai na Jihar Kano.

Shugaban hukumar Alhaji Isma’il Na’Abba Afakalla ne ya bayyana hakan yayin kaddamar da shirin, yana mai cewar wannan wani mataki ne na tsaftace harshen sha’iran yayin waken yabo a Jihar Kano.

Wata sanarwa da jami’in yada labaran hukumar Hassan Mukhtar Abubakar ya fitar yau, ta ce shugaban majlisar sha’iran Jihar Kano Malam Sidi Abba ya alkawarta cewa mambobin kungiyarsa za su martaba wannan tsari na hukumar ta tace fina-finai da dab’i ta Jihar Kano.