CAF: Ya zama wajibi Afirka ta lashe kofin duniya – Motsepe

Sabon shugaban hukumar kwallon kafa ta Afirka Patrice Motsepe, ya ce, ya zama dole daya daga cikin kungiyoyin kwallon kafa na Afirka ya lashe gasar cin kofin duniya a wannan lokacin.

Motsepe mai shekara 59 ya bayyana hakan ne yayin wani taron manema labarai da aka gudanar a birnin Johannesburg dake kasar Afirka ta kudu.

“Sababbin tsare-tsaren da za mu kawo, a nan gaba kadan muna da yakinin cewa wata kungiya a nahiyar Afirka za ta lashe kofin duniya,” inji sabon shugaban.

An dai zabi Patrice Motsepe a matsayin shugaban hukumar ta CAF a makon da ya gabata bayan da aka hana tsohon shugaban Ahmad Ahmad neman tazarce bisa matsalolin shugabanci.

Motsepe ya kuma dauki alkawarin sauka daga mukamin nasa matukar ya gaza kawo ci gaba a hukumar bayan shekaru hudu.