Corona: mutum 131 ne suka kamu da corona – NCDC

Cibiyar dakile yaduwar cututtuka ta kasa NCDC ta ce a jiya Litinin an samu karin masu dauke da cutar corona anan Najeriya da yawansu ya kai dari da talatin da daya.

Wannan adadi na cikin rahoton da hukumar ke wallafawa a shafinta na Twitter a kowacce rana sai dai a yau babu rahoton asarar rai.

A cewar NCDC jihohi goma sha hudu ne suka samu karin masu dauke da cutar ciki har da birnin tarayya Abuja.

Anan Kano ma, ma’aikatar lafiya ta jihar tace an samu kari mutane bakwai masu dauke da cutar corona a litinin din nan, cikin gwaji da aka yiwa mutane 26.

Wannan dai ya kawo adadin wadanda suka kamu da cutar a Najeriya ya kai dubu dari da sittin da daya, da dari takwas da ashirin da biyar, ciki kuwa mutane dubu dari da arba’in da takwas, da dari daya da ashirin da biyar sun warke sarai.

Sai kuma wadanda suka rasu sanadiyyar cutar da yawansu ya kai dubu biyu da talatin.