Corona: An haramta wa matafiya daga kasashen Brazil, Indiya, Turkiya shigowa Najeriya

Gwamnatin tarayya ta haramtawa matafiya daga kasashen India da Brazil da kuma Turkiyya shigowa Najeriya sakamakon tsananin da annobar cutar Corona ta yi a kasashen.

Shugaban kwamitin yaki da cutar na fadar shugaban kasa kuma sakataren gwamnatin tarayya Boss Mustapha ya bayyana hakan ta cikin wata sanarwa da ya fitar yau.

Boss Mustapha ya ce matakin zai fara aiki ne a ranar talata mai zuwa, sannan kuma za a sake nazartar batun bayan makonni hudu.

To sai dai ya ce ‘yan Najeriya mazauna wadannan kasashe da ke son shigowa kasar za a killace su har tsawon kwanaki bakwai domin tantance lafiyarsu kafin barin su su shigo cikin kasar.