Covid-19: Gidauniyar BUA ta tallafawa Kano da kayayyaki na naira biliyan biyu

Gidauniyar BUA karkashin jagorancin Alhaji Abdussamad Isyaka Rabiu ta ce a shirye take ta tallafawa Kano akan kariyar cutar Corona

Wakilin shugaban gidauniyar Dr. Aliyu Idi Hong ne ya bayyana hakan da yammacin Litinin dinnan lokacin da suka kawo kayan tallafin motocin daukar marasa lafiya biyar da motocin gudanar da aiki ashirin.

Dr. Hong ya ce a dunkule gidauniyar ta baiwa Kano tallafin naira biliyan biyu wanda a ciki ne aka sayi wannan kayayyakin.

A nasa bangaren gwamnan Kano Abdullahi Umar Ganduje ya ce wannan rana ce mai muhimmanci ganin yadda ‘yan asalin Kano ke tallafawa jihar don yaki da cutar.

Wakiliyar mu Zahra’u ta rawaito cewa kamfanin fulawa na Golden Penny da makarantar horar da hafsoshin soji ta NDA sun kawowa jihar Kano kayayyakin kula da lafiya da gwaje-gwajen cutar Corona.