COVID 19: Gwamnan jihar Bauchi ya killace kansa

Gwamnatin jihar Bauchi ta sanar da cewa Gwamnan jihar Sanata Bala Muhammad ya killace kansa biyo bayan musabiha da ya yi da dan gidan tsohon mataimakin shugaban kasa Atiku Abubakar a filin jirgin sama na jihar Legas.

Bayanin Hakan na kunshe ne cikin wata sanarwa da gwamnatin jihar ta fitar mai dauke da sa hannun babban mataimaki ga gwamnan kan yada labarai Mukhtar M Gidado.

Wannan na zuwa ne bayan da hukumar dakile cutuka ta kasa NCDC ta tabbar da cewa dan gidan tsohon mataimakin shugaban kasa na dauke da cutar.

Sanarwar ta ce kawo yanzu gwamnan bai nuna wata alama ta rashin lafiya ba, sai dai gwamnan ya killace kansa sakamakon shawara da ya samu daga hukumar dakile cutuka ta kasa NCDC, inda ta bukaci ya killace kansa domin gudun kamuwa daga cutar.