Covid-19: Rundunar ‘yan sandan Kano ta dakatar da karbar korafi baka-da- baka

Rundunar yansandan Jihar Kano ta ce za ta rinka karbar korafin da yazamo dole ne kawai ta wayar Salula domin kaucewar yaduwar cutar Korona a fadin jihar Kano.

Komishinan Yansandan Kano CP Habu Ahmad Sani, ne ya bayyana hakan ta bakin mai magana da yawun ‘yan sandan Jihar Kano DSP Abdullah Haruna, a yayin zantawarsa da wakilin mu Abba Isah Muhammad, a shelkwatar rundunar dake Unguwar Bomfai a nan Kano.

Abdullahi Haruna, ya kara da cewar sun dauki wannan mataki ne domin yaki da yaduwar cutar korona.

DSP Abdullahi Haruna, ya kuma kara da cewar idan ya zamo dole sai mutum ya kawo korafi kafa da kafa to wajibi ne yazo shi kadai maimakon gayyato abokansa.

Wakilinmu Abba Isah Muhammad, ya ruwaito cewa Rundunar ‘yansandan ta Jihar Kano ta sallami wandanda ake zargi da aikata kananan laifuka ta hanyar bayar dasu beli zuwa wani lokaci.