Da ɗumi-ɗumi: CBN ya ƙara wa’adin daina amfani da tsoffin ƙudi

Babban bankin ƙasa CBN ya tsawaita wa’adin daina amfani da tsofaffin takardun kuɗi.

Gwamnan CBN Godwin Emiefele ne ya bayyana hakan a zantawarsa da manema labarai da safiyar Lahadin nan.

A cewar Emiefele ya ce ya samu amincewar shugaban kasa Muhammadu Buhari kan karin wa’adin.

Yanzu haka dai babban bankin ƙasa CBN ya sanar da tsawaita wa’adin kwanaki 10 na daina amfani da tsofaffin takardun kuɗi na Naira a fadin Najeriya.

A yanzu dai sabon wa’adin zai kasance 10 ga watan Fabrairu maimakon ranar 31 ga watan Janairu na daina amfani da ƙudin.

Ƙarin wa’adin y biyo bayan ganawar da shugaba Buhari ya yi da gwamnan babban ƙasa CBN Emefiele a garin Daura na jihar Katsina.

Ƴan Najeriya dai na da damar ci gaba canza takardar kudin Naira daga tsofaffi zuwa sababbi har zuwa wa’adin.

Idan za a iya tunawa tun a watan Oktoba CBN ya ɓullo da sabbin takardun kudi na naira 200, 500 da 1000 tare da bayar da wa’adin ranar 31 ga watan Janairu domin daina amfani da tsofaffin takardun kuɗin.

PremiumTime: