Dalilan da ya sanya za’a fara yi wa makaraban gwamnati allurar riga kafin Corona

Shugaban kasa Muhammadu Buhari da mataimakinsa Farfesa Yemi Osinbajo har ma da sakataren gwamnatin tarayya Boss Mustapha ne za a fara yiwa allurar riga kafin cutar corona tare da watsa shi kai tsaye ta gidan talabijin.

Babban darakta na hukumar kula da asibitocin lafiya matakin farko Dakta Faisal Shu’aibu ne ya bayyana hakan a Abuja lokacin da yake jawabi ga kwamitin yaki da cutar corona na gwamnatin tarayya.

Ya ce, shugabannin hadi da wasu sanannun mutane a Najeriya ne za su fara karbar rigakafin cutar don ya zamo fadakarwa ga al’umma ga me da mahimmancin karbar rigakafin.

Dakta Faisal Shu’aibu ya bukaci ‘yan Najeriya da su tabbatar sun karbi rigakafin da hannu bibbiyu tare da bada hadin kai don yaki da cutar corona a Najeriyar.

Idan dai za a iya tunawa Najeriya na tsammanin karbar allurar rigakafin kimanin miliyan arba’in da biyu a shekarar da muke ciki.