Direbobi sun maka KAROTA da ‘Yan sanda a gaban kotu

Kungiyar direbobi masu lodi a tashar mota dake NNPC Hotoro, sun shigar da karar hukumar KAROTA da kwamishinan ‘yan sandan Kano da babban sufeton ‘yan sanda a gaban kotu.

Direbobin sun roki babbar kotun tarayya dake nan Kano, kan ta dakatar da wadanda suke kara daga yunkurin daga wurin da suke sana’ar lodi.

Lauyan masu kara Barista Sabo Malam Garba ya shaidawa Freedom Radio cewa tuni kotu ta aike da sammaci ga wadanda ake kara, tare da dakatar dasu daga daukan wani mataki akai har zuwa hukuncin kotu.