Direbobin Tirela sun bude hanyar Kano zuwa Zaria

Direbobin tirela da suka rufe babbar hanyar Kano zuwa Zaria, sun janye motocin su sakamakon halin da masu bin hanyar suka shiga bisa rufe hanyar.

Guda daga cikin wadanda suka rufe hanyar Ya’u Abdulhamid Usman, shi ne ya shaida hakan ga wakiliyar Freedom Radio Hafsat Abdullahi Danladi da safiyar yau Litinin ta wayar tarho.

Ya ce, direbobin sun bude hanyar ne saboda irin halin matsin da matafiya suka shiga bisa kulle hanyar wadda ke fama da kara-kainar al’umma daga sassa daban-daban na Najeriya.

A karshen makon da ya gabata ne muka kawo muku rahoto kan yadda direbobin tirelar suka rufe babbar hanyar Kaduna zuwa Kano sakamakon kashe dan uwan su da suke zargin wani jami’in soja ya yi, inda suka sha alwashin sai an biya su diyya sannan za su bude hanyar.