El- Rufa’i ya yi tir da fasa rumbun adana kayayyakin tallafi a Kaduna

Gwamnatin Jihar Kaduna ta yi tir da fasa rumbun adana kayayyakin tallafin rage radadin corona da wasu mutane suka yi a Jihar, inda ta ce za ta binciko mutanen tare da daukar matakin da ya dace a kansu.

Mataimakiyar gwamnan jihar Dakta Hadiza Balarabe ce ta bayyana hakan yayin da take hira da manema labarai a daren jiya a Kaduna.

Hadiza Balarabe ta ce tuni jami’an tsaro suka cafke wasu daga cikin wadanda suka yi aika-aikar inda ta ce za a iya kiransu da barayi, kasancewar sun dauki kayan da ya kamata a rabawa al’umma.

Ta kuma gargadi wadanda suka dauki kayan da kada su yi amfani da su, kasancewar wa’adin amfani da mafi yawa daga cikinsu ya kare, a don haka suna iya haifar da illa ga lafiyar bil’adama.