Gambo Muhammad ya dawo Kano Pillars a matsayin mataimakin mai horarwa

Tsohon dan wasan gaba na kasa Najeriya da Kano Pillars Gambo Muhammad ya zama mataimakin mai horarwa a tawagar Sai Masu Gida.

Gambo Muhammad ya koma Pillars ne bayan kammala karatun aikin horarwa a kwalejin harkokin wasanni ta kasa da ke birnin tarayya Abujua.

Gambo Muhammad a Super Eagles

Tsohon dan wasan zakarun gasar Firimiya ta kasa har sau hudu zai kasance da Pillars har nan da lokaci masu yawa a nan gaba.

Mai magana da yawun kungiyar Rilwanu Idris Malikawa Garu ne ya sanar da hakan, gabannin wasan da Pillars zatayi da Plateau United a gasar NFPL.

Wanda hakan zai bashi damar kasancewa a matsayin mataimakin mai horarwa mai jiran kota kwana a wasan na Plateau da Pillars a wasan mako na 12.

Gambo Muhammad dai ya shafe shekaru da dama a matsayin dan wasa a Kano Pillars FC, inda ya jagoranci tawagar lashe gasar firimiya har hudu, kafin daga bisani ya koma Katsina Utd wanda ya shafe kakar wasanni biyu a can.

Jim kadan bayan amincewa da aiki a tawagar ta Kano Pillars Gambo Muhammad ya godewa shugaban kungiyar Surajo Shuaibu Jambul, wanda ya yi alkarin zai bada gudun mawa domin ci gaban kungiyar.