Labarai
Ganduje ya yiwa Kwankwaso ta’aziyya
![](https://freedomradionig.com/wp-content/uploads/2020/12/GANDUJE-KWANKWASO-FATHER.jpg)
Gwamnan Kano Dr. Abdullahi Umar Ganduje ya aike da saƙon ta’aziyya ga tsohon gwamna Kwankwaso bisa rasuwar mahaifinsa.
Hakan na cikin wata sanarwa da Kwamishinan yaɗa labaran Kano Muhammad Garba ya fitar.
Sanarwar ta ce, Gwamna Ganduje ya tafi birnin Dubai tun a ranar Alhamis, a don haka ya ke miƙa saƙon ta’aziyya ga Kwankwaso a madadin sa da iyalansa da al’ummar Kano bakiɗaya.
A cikin sanarwar, Gwamna Ganduje ya ce, wannan rashi babban rashi ne ga al’umma, kuma marigayin abin koyi ne, la’akari da kyawawan halayensa.
Gwamna Ganduje ya kuma yi addu’ar neman gafara ga marigayin.
Alhaji Musa Saleh Kwankwaso ya rasu cikin daren Alhamis yana da shekaru 93 a duniya.
Kafin rasuwarsa, shi ne hakiman Madobi, kuma ya riƙe sarautar Maji daɗin Kano, kuma shi ne Makaman Ƙaraye wanda ke cikin masu naɗa Sarki a masarautar Ƙaraye.
You must be logged in to post a comment Login