Gianni Infantino na neman goyon bayan ƙasashen duniya

Shugaban hukumar kwallon ƙafa ta duniya FIFA, Gianni Infantino, ya aike wa da dukkan ƙasashe 211 da ke tura tawagar ƙwallon ƙafa ƙarƙashin FIFA wasiƙa, inda ya yi musu tayin samun kuɗi har dala miliyan 40 ga duk ƙungiyar da ta goyi bayan shawararsa ta sayar da wani kaso na hannun jari na gasar cin kofin duniya da FIFA ke gudanarwa.

Gianni Infantino, ya bayyana cewa duk ƙungiyar da ta amince da wannan shiri kafin ranar 19 ga Satumba za ta karɓar kaso na farko na dala miliyan 20 daga ranar 1 ga Janairun 2027.

Haka kuma, ya ƙara da cewa, daga baya za a sake bai wa duk ƙungiyar da ta karɓi kason farko, kaso na biyu watau ƙarin dala miliyan 20.