Gwamna Fubara na shirin gabatar da kasafin kuɗin bana

Gwamnan Jihar Rivers, Siminalayi Fubara, na shirin gabatar da kasafin kuɗin shekarar 2026 ga Majalisar Dokokin jihar a yau Juma’a, bayan da majalisar ta amince da tsarin Kashe Kuɗaɗe na matsakaicin lokaci na shekarun 2026 zuwa 2027 da ya gabatar a makon da ya gabata.

Ana sa ran gwamnan zai gabatar da kasafin ne a zauren da ‘yan majalisar ke amfani da shi a halin yanzu da ke Assembly Quarters, sakamakon lalacewar ginin majalisar yayin rikicin siyasar jihar a shekaru uku da suka gabata.

Wata majiya daga Gidan Gwamnatin jihar ta tabbatar da cewa an kammala duk shirye-shiryen gabatar da kasafin, tana mai cewa yau ce ranar da ake jira domin gwamnan ya gabatar da kudirin kasafin.

An jinkirta gabatar da kasafin ne sakamakon rikicin siyasa tsakanin Gwamna Fubara da Majalisar Dokokin jihar ƙarƙashin jagorancin Martin Amaewhule.