Gwamnatin Kano ta bada umarnin komawar sauran dalibai makaranta

Gwamnatin jihar Kano ta amince da komawar dalibai ‘yan aji daya da na aji hudu na Sakandare makaranta a ranar Litinin mai zuwa.

Kwamishinan Ilimi na jihar Kano Malam Muhammad Sanusi Sa’idu ne ya bayyana hakan, yana mai cewa komawa makarantar ta shafi ‘yan makarantun jeka-ka-dawo da na kwana a makarantun gwamnati dana masu zaman kansu.

Sanusi Sa’idu Kiru ya ce daliban makarantun kwana za su koma makarantar ne a ranar 15 ga watan Nuwamba, inda kuma na makarantun jeka-ka-dawo za su koma a ranar 16 ga watan.

Sai dai ya bukaci, shugabannin makarantun da su gudanar da duk wasu shirye-shirye don komawar daliban makaranta.