Gwamnatin Katsina ta sha alwashin samar wa yan sanda kayan aiki

Gwamnatin jihar Katsina, ta ce za ta tallafa wa ‘yan sanda da kayan aikin da suka dace domin wanzar da zaman lafiya a lokacin zabe da bayan gudanar da shi. 

Gwamnan jihar Aminu Bello Masari, ne ya ba da tabbacin lokacin da ya karbi bakuncin sabon mataimakin babban sufeton ‘yan sanda Ahmed Abdulrahamn, mai kula da shiyya ta 14 da aka tura jihar da ta kunshi jihohin Katsina da Kaduna.

Gwamna Masari ya ce, jihar Katsina na bukatar karin jami’an ‘yan sanda domin samar da tsaro yadda ya kamata

Haka kuma, ya yi wa mataimakin babban sufeton ‘yan sandan fatan samun nasara wajen gudanar da aikin sa.

A nasa jawabin Ahmed Abdurahman, ya ce, zai yi duk mai yiwuwa wajen ganin an samu wadataccen tsaro yayin gudanar da zaben gwamnoni da ke tafe.