Gwamnatin Sokoto na shirin fara rabon kayan haihuwa kyauta

Gwamnatin Jihar Sokoto ta ce za ta fara rabon kayan haihuwa kyauta ga mata masu haihuwa a asibitocin gwamnati, domin rage mace-macen mata da jarirai.

Kwamishinan Lafiya na jihar, Dakta Faruk Abubakar, ne ya bayyana hakan a wajen taron gabatar da rahoton tantance ayyukan gaggawa na kula da mata masu nakuda da jarirai a jihar ta Sokoto.

Ya ce gwamnati za ta kuma samar da wutar lantarki mai amfani da hasken Rana a dakunan haihuwa, tare da inganta ayyukan kula da mata masu juna biyu.

Kwamishinan ya ce gwamnati na ƙoƙarin magance matsalolin jinkirin neman lafiya, jinkirin isa asibiti da kuma jinkirin samun ingantaccen magani, wanda ke haddasa mace-macen mata masu juna biyu.