Gwamnatin Tarayya na gudanar da bincike kan yadda aka yi amfani da kuɗaɗen kiwon lafiya

Gwamnatin Tarayya ta ce, ta na gudanar da bincike kan yadda aka yi amfani da kudaden kiwon lafiya, yayin da ‘yan Najeriya ke ci gaba da fuskantar tsadar magani da sauran kudaden jinya da suke biya daga aljihunsu.

Hukumar Inshorar Lafiya ta Najeriya NHIA, ta ce, gwamnatin tarayya ta fitar da Naira biliyan 235 ta hannun Asusun Samar da Kiwon Lafiya a matakin farko cikin shekaru uku.

Hukumar ta kuma bayyana cewa adadin mutanen da suka yi rajistar inshorar lafiya ya haura miliyan 23, amma har yanzu iyalai da dama na fuskantar matsalar tsadar kula da lafiya.

NHIA ta ce za a tattauna batun ne a wani taron kwana biyu da zai fara yau Litinin 28 ga Satumba, inda masana za su duba yadda za a yi amfani da kudaden kiwon lafiya yadda ya kamata, da kuma tabbatar da cewa karin kashe-kashen kudin gwamnati na haifar da ingantaccen sauyi ga al’umma.