Gwamnatin Tarayya za ta kashe fiye da Tiriliyan 6 a tallafin Fetur- El-rufa’i

Gwamnan jihar Kaduna Malam Nasir El-Rufa’I ya ce, gwamnatin tarayya za ta kashe sama da naira tiriliyan shida a matsayin kudin da za ta bayar na tallafin man fetur a cikin watanni shida na wannan shekarar da muke ciki.

El-Rufa’I ya bayyana hakan a wani taron masu ruwa da tsaki a bangaren lafiya karo na 12 wanda aka gudanar a jihar Kaduna.

Gwamnan ya kuma kara da cewa, za’a sake kashe kimanin naira tiriliyan hudu a matsayin kudin tallafin Naira, haka kuma Najeiya za a kashe kimanin biliyan dari uku a matsayin kudin tallafi a bangaren hasken wutar lantarki.

El-Rufa’i ya kuma zargi kamfanin NNPC da cewa bai sanya ko sisi ba a asusun gwamnatin tarayya na rabin shekarar 2021 da ta gabata, wanda hakan yasa Najeriya ta dogara da kudaden da take samu daga ketare da kuma kudaden harajin cikin gida.