Gyaran ciyawar filin wasa: Bamu yadda a kashe miliyan 81 ba – Minista

Ministan matasa da wasanni Sunday Dare, ya ce, ma’aikatar wasanni taki amincewa da kudirin kashe sama da naira miliyan 81 wajen daidaita tsawon ciyawa a filin wasa na Moshood Abiola dake a birnin tarayya Abuja.

Dare ya bayyana hakan ne a shafinsa na tweeter, inda ya ce ma’aikatar tayi watsi da wannan kudirin.

Ya kuma ce, babu shakka ‘yan Najeriya zasu koka matukar aka gaya musu cewa an lalata naira miliyan 81 kan daidaita tsawon ciyawa a filin wasa.

Ministan ya ce “An kawo wa ma’aikatar kudirin amma bata amince ba saboda bai kamata a kashe kimanin wadannan kudin ba, zaifi dacewa a zuba hannun jari dasu.”