Har yanzu bamu tsayar da makin samun gurbin shiga jami’a ba -JAMB

Hukumar shirya jarabawar shiga manyan makarantu ta kasa Jamb, ta ce har yanzu bata kai ga tsayar da makin jarabawar da dalibi zai samu kafin ya a bashi gurbi a jami’a.

Hukumar ta kuma bukaci al’ummar Najeriya musamman dalibai da kada su yadda da duk wani bayani da zasu samu kan batun makin inde ba daga hukumar ya fito ba.

Hukumar ta ce kawo yanzu ba za’a fitar da adadin makin ba, har sai an zauna taron masu ruwa da tsaki, karkashin jagorancin Ministan Ilimi na tarayya Malam Adamu Adamu, wanda aka shirya gudanarwa a ranakun 15 da 16 a watan yuni mai zuwa.

Shugaban sashen yada labarai na hukumar Dr. Fabian Benjamin ne ya bayyana hakan ta cikin wata sanarwa da ya fitar, inda ya yi watsi da duk wasu rahotanni da ke yawo cewa hukumar ta fitar da adadin makin da ake bukatar dalibi ya samu kafin samun gurbi a jami’a.