Hatsarin jirgin kasa ya yi sanadiyar mutuwar mutane 36

Akalla mutane talatin da shida ne suka rasa rayukansu sanadiyar wani hatsarin jirgin kasa da ya abku a kasar Taiwan.

Rahotanni sun ce, hatsarin ya faru ne bayan da jirgin kasar ya kaucewa hanyar sa a gabashin kasar Taiwan da safiyar juma’a.

Bayanai sun ce wannan hatsari shine mafi muni cikin shekaru arba’in da ya gabata a kasar ta Taiwan.

Ministan sifiri da sadarwa na kasar Lin Chia-lung, ya ce, tuni aka kai wasu mutane arba’in wadanda suka jikkata zuwa asibiti don ci gaba da duba lafiyar su.

A bangare guda, masu aikin ceto na ci gaba da zakulo mutane da ake zargin sun makale sanadiyar hatsarin.