Hatsarin Mota: Ana fargabar liman da matasan Kano 7 sun rasu a Katsina

Ana fargabar hatsarin mota a Katsina ya hallaka liman da wasu matasa kimanin bakwai ƴan unguwar Kurna ta jihar Kano.

Mai unguwar Kurna Tudun Bojuwa, Kwaciri Malam Umar Usman ya tabbatar wa da Freedom Radio faruwar al’amarin.

Sai dai yace, har yanzu ba a gama tantance adadin waɗanda abin ya shafa ba.

Matasan unguwar sun gamu da wannan hatsari ne ranar Laraba, a hanyar su ta zuwa jihar Katsina domin ɗaurin auren almajirin babban limamin yankin Malam Iliyasu Nagurasu, wanda shi ma ya rasa ransa a hatsarin.

Freedom Radio ta ziyarci gidan limamin da misalin ƙarfe 4:45 inda ake shirin yi masa jana’iza.

Yanzu haka dai ana zaman alhini a unguwar yayin da ake dakon isowar gawar sauran waɗanda lamarin ya rutsa da su.