ICPC ta kama mutane 4 bisa zargin su da sayen kuri’a

Hukumar ICPC mai yaƙi da cin hanci da rashawa ta ce, jami’anta sun kama mutane huɗu bisa zargin su da sayen ƙuri’a yayin zabe a jihohin Sokoto da Katsina.

A wani saƙo da hukumar ta wallafa a shafinta na Tuwita ta ce, ta kama mutanen ne jiya Asabar a yayin da ake gudanar da zaɓen gwamna da na ‘yan majalisar dokokin jihohi.

Haka kuma hukumar ta ce, an kai wa jami’anta hari tare da raunata mutum guda a jihar Sokoto.

ICPC ta ce an kai wa jami’an nata harin ne a daidai lokacin da ta kama mutum uku masu sayen ƙuri’a a zaɓen.