Ina Salihu Yakasai ya ke?

An wayi gari Asabar da samun rahoto daga makusantan Salihu Tanko Yakasai kan cewa bai dawo gida ba tun a ranar Juma’a.

Hakan kuma ya zo ne bayan da ya wallafa wani saƙo a shafinsa na Twitter da a ciki ya bayyana gazawar Gwamnatin jam’iyyar APC mai mulki.

Jaridar Daily Trust ta rawaito cewa, mahaifinsa Alhaji Tanko Yakasai ya ce, jami’an tsaro ne suka cafke shi.

To amma amma hukumar tsaron DSS ta ce, ba ita ta cafke shi ba.

Labarai masu alaka:

Ina Salihu Yakasai ya ke?

Dalilan da suka sanya Ganduje ya dawo da Salihu Tanko kan mukaminsa

Jaridar Daily Post ta rawaito shugaban hukumar tsaron farin kayan shiyyar Kano Muhammad Alhassan na cewa, ko gayyatar Salihun ba su yi ba, balantana su kama shi.

Ko da Freedom Radio ta tuntuɓi shugaban hukumar ya ce, bai san komai ba game da lamarin.

Freedom Radio ta tuntuɓi sakataren yaɗa labaran Gwamnan Kano Malam Abba Anwar sai dai ya ce, ba a bashi izni ya yi magana kan batun ba.

Yanzu haka dai ƴan Najeriya da dama ne suka shiga yin kiraye-kiraye kan ɓatan Salihun musamman a kafafen sada zumunta.

Ga wasu daga ciki:

Waye Salihu Yakasai?

Shi ne mai taimaka wa Gwamnan Kano kan yaɗa labarai, fitaccen mai amfani da kafafen sada zumunta ne da lokaci zuwa lokaci ake damawa da shi a siyasar kafafen sada zumunta.

A shekarun baya dai yana cikin waɗanda ke kare muradan Gwamnatin jam’iyyar APC tare da yin raddi ga duk wanda ya saɓa mata.

A watannin baya ma dai Gwamnan Kano ya dakatar da shi daga muƙaminsa bayan da ya soki tsarin gudanarwar Gwamnatin tarayya.