Inter Milan ta nada sabon mai horaswa

Kungiyar kwallon kafa ta Inter Milan ta nada Simone Inzaghi a matsayin mai horas da ‘yan wasan kungiyar bayan ficewar Antonio Conte daga kungiyar.

Inzaghi mai shekara 45 ya sanya hannu a yarjejeniyar kwantiragin shekaru biyu da kungiyar.

Inzaghi dai ya ki amincewa ne da sabunta kwantiraginsa da kungiyar kwallon kafa ta Lazio bayan karewar kwantiragin a makon jiya.

Takwas daga cikin manyan kungiyoyi goma dake fafatawa a gasar Serie A sun canja masu horaswa tun a karshen kakar wasannin da ta gabata.

Antonio Conte ya bar Inter Milan ne a watan Mayun 2021 yayin da ya rage shekara guda kafin kwantiraginsa ya kare.