Jami’an Customs sun kama kwayar Tramadol ta fiye da Biliyan 1

Hukumar yaki da fasakwauri ta Nijeriya Customs, ta cafke tarin kwayar nan ta Tramadol da kudinta ya haura sama da biliyan daya a filin jirgin saman Murtala Muhammad, da ke jihar Lagos.

Babban jami’in hukumar a jihar Lagos Muhammad Yusuf, ne ya bayyana hakan a Larabar makon nan yayin zantawarsa da manema labarai.

Muhammad Yusuf, ya ce, sun samu nasarar cafke kwayar ne a tsakanin watan Janairu zuwa Mayu wanda aka shigo da su daga kasashen da suka hada da Pakistan da India.

Haka kuma ya ce, sun kama tarin kwayoyin ne sakamakon rahotonnin  sirrin da suka samu daga kwararrun jami’an hukumar  a filin jirgin saman  kuma da zarar sun kammala bincike za su mika kwayar ga hukumar yaki da fataucin miyagun kwayoyi ta NDLEA domin daukar mataki na gaba.