Jami’ar Yusaf Maitama Sule za ta bawa dalibai dubu 4 gurbin karatu a shekarar 2021

Jami’ar Yusuf Maitama Sule ta ce za ta ci gaba da baiwa dalibai ingantaccen ilimin da ya kamata domin inganta tattalin arzikin kasar nan.

Shugaban Jami’ar Farfesa Mukhtar Atiku Kurawa ne ya bayyana hakan yayin zagayen duba yadda za a gudanar da jarrabawar tantance daukar daliban da za su shiga jami’ar a bana.

Ya kara da cewa sama da dalibai dubu tara ne za su rubuta jarrabawar tantancewar a bana.

“Hukumar kula da Jami’o’i ta kasa NUC ta amincewa jami’ar daukar dalibai dubu hudu,” in ji Kurawa.

Za dai a gudanar da jarrabawar tantancewar a jami’ar a ranar litinin 12 da kuma 13 ga watan Afirilu 2021.