Kano: An bankaɗo shagon da ake sauya wa kayayyaki wa’adin ƙarewa

Hukumar kare haƙƙin masu sayen kaya ta jihar Kano ta bankaɗo wata maɓoya da ake sauya lokutan ƙarewar wa’adin kayayyaki a yau Litinin.

An bankaɗo wurin ne a kasuwar Sabon Gari, inda aka samu wasu matasa guda goma da aka ƙulle ciki domin yin aikin.

Kayayyakin da aka same su sun haɗa da kayyakin sarrafa abin ci da abin sha.

Mai taimakawa Gwamnan Kano kan hukumar KAROTA Nasiru Usman Na’ibawa ya tabbatar da faruwar lamarin.

A cewar sa, sun samu matasan ƙulle a ciki inda suke wannan aiki na sauya lokutan wa’adin ba dare ba rana.