Kano: Gobara da hadura sun hallaka mutane da dama a watan da ya gabata

Hukumar kashe gobara ta jihar Kano, ta ce, mutane tara ne suka rasa rayukansu, sakamakon ibtila’in gobara da hadurran ababen hawa da suka wakana a watan Fabrairu da ya gabata.

A cewar hukumar, an buga mata kira ta wayar tarho har sau tamanin da biyar yayin da ta samu nasarar ceto mutane talatin da daya.

Jami’in yada labarai na hukumar, Sa’id Muhammed Ibrahim ne ya bayyana haka, yayin zantawar sa da tashar Freedom Rediyo da yammacin yau.

Sa’id Muhammed Ibrahim ya kuma ce an yi asarar naira miliyan ashirin da bakwai da dubu dari da talatin da hudu da dari biyu cikin wa’adin.

‘‘Mun kuma samu nasarar tseretar da dukiyoyin jama’a da adadin kudinsu ya kai naira miliyan dari uku da talatin da bakwai da dubu dari da hudu’’. A cewar sa.

Ya kara da cewa, hukumar ta samu nasarar ceto mutane arba’in wadanda suka fada ibtila’I daban-daban cikin wannan wa’adi na watan Fabrairu.

Haka zalika kakakin hukumar kashe gobara ta jihar Kanon ya ce, hukumar ta karbi kiraye-kiraye da bana gaskiya ba, har guda goma sha uku.

Karin labarai:

Gobara ta tashi a gidan dan majalisar wakalai na jihar Zamfara

Gobara ta tashi a kasuwar GSM ta Alfin a Kano