Kano: Majalisa ta amince da yin gyaran dokar masarautu

Majalisar dokokin jihar Kano ta amince da karatu na biyu na gyaran dokar masarautun jihar, wadda Gwamna Abdullahi Umar Ganduje ya mika bukatar hakan.

A kwanakin baya ne dai gwamnan ya aikewa majalisar bukatar yin gyara ga dokar da ta kafa masarautun da nufin kawo wasu sauye-sauye.

Yayin zaman majalisar na yau, shugaban masu rinjaye na majalisar Alhaji Kabiru Hassan Dashi, ya bukaci goyon bayan ‘yan majalisar kan amincewarsu da karatu na biyu na dokar, inda kuma nan take suka amince.

Kabiru Hassan Dashi wanda kuma shi ne mai wakiltar karamar hukumar Kiru, ya ce, “Yin gyara ga dokar zai sauya tsarin shugabancin sarauta daga rikon shekaru biyu-biyu tare da kara mutum daya cikin masu zabar sarki”.