Mafi yawan jami’an Gwamnatin Kano suna tare da mu a ɓoye – APC G7

Jam’iyyar APC tsagin Sanata Malam Shekarau ta ce, mafi yawan jami’an Gwamnatin Kano suna tare da ita a bayan fage.

Ɗaya daga cikin jagororin tsagin Alhaji Murtala Alasan Zainawa ne ya bayyana hakan, a zantawarsa da Freedom Radio.

Zainawa ya ce, kaso tamanin zuwa casa’in na muƙarraban Gwamna Ganduje suna tare da su, lokaci ne kawai zai bayyana hakan.

Ya ƙara da cewa G7 su ne waɗanda suka taimaka wa Ganduje har ya kafa Gwamnati.

“Mu ba zamu zuba ido ana yin ba daidai mu yi shiru ba, shi ya sa muka kawo G7 domin mu tsaftace jam’iyya” a cewarsa.

Alasan Zainawa ya ce, suna fatan za a shawo kan dambarwar cikin gidan da jam’iyyar ke fuskanta.