Masu cutar Corona 187 suka rage a Kano

Gwmanatin jihar Kano ta ce zuwa yanzu mutum 187 ne suka rage cikin masu jiyyar cutar Corona a jihar.

Ma’aikatar lafiya ta Kano ta sanar a ranar Litinin ta shafinta na Twitter cewar, an yiwa mutane 128 gwajin Corona a jihar, kuma sakamakon gwajin ya nuna cewa dukkan su ba sa dauke da cutar.

Mutum 1,268 ne dai ma’aikatar lafiya ta Kano ta tabbatar da cewa sun kamu da cutar, cikin mutane 14,448 da aka yiwa gwajin cutar a jihar.

1,029 daga cikin masu cutar sun warke, sai mutum 52 da suka rasu sanadiyyar cutar.