Matashin da ake zargi da ƙwacen waya ya mutu- Yan sanda

Rundunar ‘yan sandan jihar Kano, ta tabbatar da mutuwar matashin nan da ake zargi da aikata fashi da makami ta hanyar amfani da Danbuda wajen yiwa wata mace kwacen waya akan titin Zoo Road a karshen makon jiya.

Hakan na ƙunshe ne ta cikin wata sanarwa da mai magana da yawun rundunar ‘yan sandan Kano SP Abdullahi Haruna Kiyawa ya fitar yau Talata.

Abdullahi Haruna Kiyawa ya ce, matashin ya mutu ne da sanyin safiyar yau Talata a Asibitin Kwararru na Murtala Muhammad.

Tunda da fari dai Matashin ya kwace wayar wata mata ne, bayan ya yi mata barazana da Dan-buda, kuma a kokarinsa na tserewa ne mota ta taka shi ta karya masa kashin gadon baya da kuma wani mummunar rauni akan sa.