Me yake faruwa da Rarara?

Da alama dangantaka ta ƙara yin tsami tsakanin mawaƙin APC Dauda Kahutu Rarara da Gwamnatin Kano.

A baya dai tuni mawaƙin ya ayyana cewa ba zai yi jam’iyyar APC a Kano, har ma ya rungumo ADC ta Sha’aban Sharaɗa.
Sai dai yanzu haka an wayi gari da zazzafan martani tsakanin mabiyan Rarara da magoya bayan Gwamnatin Kano.

Hakan ya biyo bayan wata sabuwar waƙa da Rararan ya fitar kan ɗan takarar APC Bola Ahmad Tinubu.

A cikin waƙar mawaƙin yayi gugar zana da habaice-habaice wanda ba a tantance dawa yake ba.

Ga kaɗan daga ciki.

•Kace a cire sunana wannan na ji

•Dama ban ce a saka ni ba inda kaji

•Duk wani taro da kake kaina to na ji

•Mu harkar Tinubu ba sai da takarda ba•Shi dai zabo a sanina baya cara

•Ko a buga ko a bari dai nine Rarara

Na ari rigar gamji ko dan nayi sara

•In Dutse ya kafu ba dai turewa ba.

Magoya bayan Gwamnatin Kano da dama ne dai suka yi martani musamman a shafukan Facebook.

Ciki har da shugaban ƙaramar hukumar Nassarawa Auwal Lawan Shu’aibu Aranposu.

Wanda ya ce
“Zamu saka Manjagara, Mu yage Hakoran mutum, wargi fa waje yake samu”.

Wasu bayanai da Freedom Radio ta samu sun nuna cewa ɓarakar na ƙara zafafa ne kan shirye-shiryen zuwa Bola Ahmad Tinubu Kano wanda kowane ɓangaren ke ganin yana da ruwa da tsaki.